Ghadya n3awd likoum 9sti. Kbert f wa7ed douar. Wa7ed n8ar, kount rakba 3la 7mar (7achakoum). M3a bent khalti Izza, kena nsguiw elma f lbir. El mou8im, ben liya Jwilili ould el7ajja Fatna, rakeb f lkarwela. Dakht. Ta7t men foug l7mar. Bent khalti ma fa8met walou. Kay 7seb li8a darbatni salma , m3a hadek n8ar, kanet el7arara w ma ghataytch rassi. Jwilili , Jwilili .... ach ghadya ngoul likom. Ma 9arich, ma kay3raf la binjour, la binsouar. Ma say9 ldenia khbar. Ma 3ando la m3a lbnat, la m3a lbar. Machi men dak nw3 li kay chiyer 3lik b l7jar. Madi8a f lkhayma, f lghlem, w lbgar. Kay goulou b li kay lbess 50 f rjli8, 3ando jeb8a, ma b9at 3ando 7ta darssa, w 3ayni8 kbar Ewa, Jwilili mcha elkhaymto. Tga3edt. Kemelna chghol m3a bent khalti. Guelt lmouy : walou khassni ntzawej b Jwilili, liyoum 9bel gheda. Galet li : darbek daw wla malek, douzi tnokhdi chakwa w nsay 3liya hadchi. Jwilili ra8 weld mou. Walakin, ma 9dartch nsa8. Guelt lmouy : ila ma khditouch, ghadya ndir f rassi chi mosseba ke7la. Waaaa mouuuuy , rjal 9lalou. Bghetini nb9a bayra. Choufi bnat douar, 7ta wa7da fina ma tzawjet men ba3d hadek l3am li ja fi8 eljaffaf. 8adi 8iya elmounasaba. Drob el7tab m 7adou rtab.
Ewa, 3la sa3d8a w wa3d8a, mchat m3aya mouy lkhaymat Jwilili. Jaybin m3ana, ntouma mwalin elkheir, goufa fi8a 9waleb dial sokar ,boudiza dyal zit, boudiza dyal lben, w 9ar3a dyal smen el7ar. Ana 8aza 2 frarej marbotin b 9ninba w 2 3atougat. Lkleb (7achakoum) kay neb7ou. Da9eyt f lbab. Haaaaaaaaaa chkounnnnnnnnnnnnnn Mouy : Wa Tamouuuu bent el7ajj 3mor. Dokhli khoytiiiiiiiii . Ch7al twa7echnak. Mar7ba w elf mar7ba, n8ar kbir 8ada. A ti w kidayra ?
(3anguetna moot Jwilili w selmet 3lina ... hadik teslima dyal nass la3robya ... jab Allah may kanech corona khalat8a mouy Na3ima).
Modifié 5 fois. Dernière modification le 24/07/20 15:39 par لبطانة.
Brekna f lkoba. Kanet 3andhoum Khadouj bent Qaddour, wa7ed el bargaga man n3awedch likoum 3li8a. Kata3raf chada w lfada. Selemna 3li8a. Sana el7ajja Fatna yallah ghadya t7ot sinya dyal atay, w lkhobz m3a zebda. Chrabna, klina w jbedna el mwdo3. Jwilili kan f lkouri, barek yrbat f lb8aim, ma jayb ldenia khbar. Tamou : khti Fatna, ana jaya talba raghba f yed wouldek Jwilili l benti Dawya. Khadouj w el7ajja Fatna tsadmou. Wa7da ket chouf f lokhra. Khadouj, mtawra, galet lFatna : nodi khoyti kelmi Jwilili, l8adra rah 3li8 ya li 7ader 3ayni8. 3rafti chno, ghadya nemchi m3ak l3ando. (Hadchi ghir bach y8adro bjoujat 9bel ma ychoufou Jwilili). Nadou, khalawna kan tsenaw, deben yguejguej 3lina. Mouy galet liya : safi, hadchi li bghayti. Koun kan book 3aych, kora 3ta9 cheb3a dial la3moud 3la hadchi li seyra diri fi8. Awiliiii… m3a men, m3a Jwilili, ma 3ando drass … w ghadya nti tolbi8 lzwaj … khalini sakta, daba tardag liya elmarara b sbabek… Ma ghadya tjibi8a ghir f rassek, 3a9li 3la 8aderti.
Modifié 4 fois. Dernière modification le 24/07/20 13:45 par لبطانة.
Khadouj : Fatna, tsenay. Wagfi 8na (7da el7amam), n8adro chwiya, bla men bano lihoum. Khoyti ach ban lik f 8ad chi ? Ana ba3da tsdamt. Rajel howa li kay khtob lmra, machi el3aks. Yak ma wldek kay 3rafa w dayr chi mosseba bla khbari ? Fatna : 7ta ana jani hadchi 3jeb. La la, kan na3raf weldi meziane, 7adfa8 ma2, ana li 3ajna8. Khadouj : w nti ki jatek el bent ? Fatna : cheft fi8a meziane, men rass8a lrjli8a. Banet liya 9ar3a, snen8a 3awjin, samra chwiya (chemch 9dat 3li8a), ma 3and8a sa7a, fin houma 8adouk der3in li ghadyn y8azou dlou, w 8adouk rejlin li ghadyin ychatfou 3la le3bana. Awili jeda … Lala weldi khasso … Jwilini, achno jay dir 8na ? Jwilili : rbat a mouy lb8aim w ghady ndkhol l7amam nghssel 7alti, 3lach ? Fatna : khalina men had chi. Kaynin a weldi chi dyaf. Tamou w bent8a Dawya jaw. Baghin ytalbok lzwaj. Jwilili : ana ? (w houwa 3ajbou el 7al) Fatna : wa yehh, nta. Fatna : aji nta ba3da, ma 3amrek ma dwiti m3a elbent ? Jwilili : la, mouy, raki 3arfani, ma ken dir walo bla chwarek. Walakin fayt chayf8a men b3id. Meskina, ma 3and8a sa7a. Ghir 8adik n8ar, ta7et men foug el7mar. W 39alti, 8iya li kanet ta7et men el karro, n8ar 3arss khal8a. Zed el3awd, bent khalt8a Izza deghya berket w 8iya, t9iiiila, b9at wagufa. Jab Allah kanou l3yalat li chedou8a. Fatna : yak el7raymi, ch7al men 7ajja ma radch le8a elbal, w 8adi 39alti 3le8a. El mou8im a weldi, ma ghadych tzawej bi8a. 3ta Allah lbnat f douar. Alf we7da tmenak.
Khadouj : khti Fatna, aji, bghet ngoulek chi 8adra.
(Jwilili ba3ad 3la mou w elbargaga) .
Fatna : ana ken sem3ek. Khadouj : ila kan 3a9li kay nfa3ni, rani sam3a b li Dawya 3and8a chi rzayek khala8 le8a bou8a Allah yra7mo. W 8ad sa3a, ma sma3t 3li8a ghir elkheir. Waldek ra8 tale3 f 40 3am. Ma 3amro ma8dar lik 3la chi mra w tlab menek tkhotbi8a li8. Ymta ghady ydir wlidatou ? Leman ghady ykhali 8ad elkhayma ? Fakri meziane, jab li8 Allah mra bla ma ytma7an. Fatna : (bchwiya) Jwilili, Jwilili, Jwilili (b ja8d) : haaaaaaaa Jwilili hayyyyyyyyyy Jwilili : a n3ammmmmm a mouy. Fatna : Allah y3tek mard 3am. Malek, smakiti ! Fin ghberti ? Jwilili : kent f elkechina, jani jou3. Fatna : nta dima madrob 3la kerchek. Chouf a weldi, ghady tzouwej b Dawya. Jwilili : walakin a mouy, yallah guelti … Fatna : makayn ma walakin. Ila bghiti rdati, tzouwej b Dawya. Jwilili : wakha mouyyy. (fer7an m3a rasso) , n9dar nchouf8a w ndwi m3a8 9bel el3arss ? Fatna : sir ghssel 7altek. Ydouz el3arss w t3araf 3li8a. Salina el8adra.
Ra3jou Khadouj w Fatna, lkoba li 3la bara, 3and Tamou w Dawya : sem7ou lina 3la 8ad ta3tela, ra8 w7el Jwilili m3a wa7ed elbagra. Ymken ja8a boussfer.
(Galou nass zman : el7ila 7sen men el3ar)
Tamou : Ma kayn mochkil. Nadra, achno kay goul Jwilili f had chi ? Fatna : 9abel. Khadouj salat 3la nbi w darbet8a b wa7ed tzaghrita fa3la terka.
Modifié 5 fois. Dernière modification le 24/07/20 15:44 par لبطانة.
8adi wa93a : Kena ghadyn nkhtaro d8az lmart khali (li 7ta 8ya men la3robya). Mchina lmdina m3a mouy, li 8ya jedati. Khali ma kanech 3aref ch7al kat lbess f rjli8a. W mouy 8ya li kanet chayfa "la3rossa". La3rossa ma kanetch 7adra. Souwelna moul sbabet ch7al ket lbess f rejli8a. Ma 3rafnach w guelna lmouy : 3inek mizanek, rjal8a sghera ? kbira ? 9adri ch7al ket lbess. W gualet meskina : 46. Gali8a moul sbabet : a chrifa, fayt lik chefti sebat 46 ? Gualet li8 : la. Ana ma kan na3raf walou f had chi.
Tamou : ewa Allah ykemel b lkheir (ma kharjet8a men foum8a ghir bezzez ). El mou8im, 7na t3atelna, ba9a tab3ana tregu. Khadouj : walakin, ma 8dartouch f l3arss, f sda9, fl7enna w dza8, n8arech … Tamou : sem7ouliya, s8ait. (Tamou, ma 3ajeb8ach el7al, dayra ghir elkhater elbent8a). Khadouj : ch7al talbin f sda9 ?
Yallah bghat mouy tjawb w 8ya tna9ez moot Jwilili ; Fatna : ana talba 5 alf derhams. Weldi khassho ma ylbess f 3arsso, w ana khassni men 7ot ldyaf. Mouy sektat. W kount 3arfa b li ma kanetch radia b 8ad chi. (Bini w binkoum, f sda9i, kount bagha louiz ).
Tamou : walakin … (9at3et8a Fatna fl8adra) Fatna : ewa Tamou, bentek li bagha tzouwej b weldi. W 8ad sa3a, ma derna f tajine ma yt7ragu. Mouy chafet fiya, koun sabet chi matmora li takhcha fi8a kora tekhchet fi8a men ch7al. Khadouj : 8adi mam taf9ach m3ak fi8a. Rajel li khasso y3te sda9, machi lmra. Fatna : wakha, sda9 3lina. Ghady y3te8a li 9asem Allah. Ama el3arss ma 3andi bach ndiro. Ila bghat 7it 7efla, tdir8a men 3and8a. Khadouj 7awlet tlagui slouka : Tamou, Fatna, ra8 loulidat baynin far7anin, ghir sa3fou m3ahoum. Daba koulchi ydouz b kheir w 3la kheir, w yb9a ghir t3awid.
Taf9o la3yalat 3la koulchi. Tamou w Dawya raj3ou lkhaymethoum. F tregu, Tamou kan tala3 li8a dem. Ma kan fi8a li y8dar. Ykfi8a 8ad el3rass m3awej men louwel. 7ad8a gualet lDawya: bazz a bniyeti bazz, li f rassek f rassek. Choufi, ghadya tzouwji bi8 w dargui 3liya zlaftek. Ila w9a3 chi mochkil, mat 3atbich bab kheymeti. Mennek lihoum.
L7al9a jaya => 3arss Dawya f la3robya.
Modifié 2 fois. Dernière modification le 24/07/20 17:41 par لبطانة.
N8ar louwel, f la3chya : Jma3na bnat w 3yalat men l3a2ila. Fatna ma kanetch. 8adek n8ar, n8ari. Ana kount gualsa, labsa 9ftan byad, bla 7zem. Cha3ri matlo9 bach ydafro8 lia l3yalat. W koul dafra kay delsou 3li8a chwiya dial 7ana, w kay ghaniw. Ma dayra la k7ul la walou. Chi 3yalat kay darbo b ta3rija. Ha li chada lbendir. Ha li dayra sinya goudam8a w ket l3ab b lkissan. Ha li ket zaghret. Lbnat kay chat7o. Kena fer7anin, ila mouy .. .wakha 7awlet mat biyen lina 7ta 7ajja. Meli kemlou l3yalat m3a char3i, chedou liya rassi b zwiyef. Klina, chrabna, d7akna. Ferechna ldiaf fin yna3sou. (Ma 3adnach sdader. Ch7al zwina hadik na3ssa f l2ard). Khalina chem3a cha3la. Tlabna khalti Izza tkhaber lina chi khobera. 3awdet lina 9isset 8aina w lghol.
8aina, ach 3chek lila …
Modifié 2 fois. Dernière modification le 24/07/20 21:58 par لبطانة.
N8ar tani : Sba7, fa9na bekri. Ana w lbnat jme3na ruina. L3yalat nado lkechina ywjdo lghda. Lyoum, n8ar l7enna, 3a2ilt Jwilili ghadya tji w tjib m3a8a d8az. (Hadek d8az li khalessna men 3adna. Jwilili daz elbara7 b n8ar w da8 lkhaymthoum : kayn lward, l7ana, tmar, lma zhar, l3oud kmari, serghina, swak, lfanid m3a lmsika Flash, sokr, zit, l7lib, lfakia … b nesba l7wayj, jouj jouj men el 7ajja … twab, pijamat, re7a, chrabel (7it ma 3andich m3a sebat taloun), sekan, zyoufa …) Dkhalt l7amam n3oum. Bent khalti Izza 8ya li 7alet liya dafrat. Bent khalti Izza : 3rafti Dawya, ghadya ntwa7ech bezzaf. Chkoun li ghady yl3ab m3aya ldama w lmala , w ydrob m3aya b ta3rija, w yghani m3aya, w ychta7 m3aya, w ysgui m3aya lma2 w y3ayeb m3aya khaltna Fatoch, w y3oum m3aya f l3ayn w y …. (bdat tebki) Dawya : 7ta ana a khoytiiiiiiiii. Dawya 3anguet bent khalet8a w bkat m3a8a. Dawya w bent khalt8a deyrin b7al twimiyat. (Lfra9 s3eb).
Lghda wjed. Lbnat w l3yalat sayrin ygadou 7althoum. Ha li galsa t3akar, ha li barka tka7al. Ha li barka tsouwek. Ha li ket gad f zif8a. Ha li ket dir re7a. Ha li barka tdeless elbommada Shirley f wja8a . Ha li ket zalagu dra38a b dhoubat. Ha li ket 9aleb 3la 7zam li yji m3a takchet8a. Rakoum 3arfin la3yalat fach kay wejdou rasshoum l chi mounasaba. Sawbo l3yalat blassti f lkoba lkbira. Rjal ghadyn ykounou f lkoba sghera. Lebsou liya 9ftan flkhdar. Darou liya ghir lk7ul, w swak, bach ytla3 ser w lmel7. Char3i matlo9 w fi8 ri7t el7enna.
To to to … to to to … 8ada ghir klaxoun dyal tonobil Khali. Jayb m3a8 tabala w lgheyata. Kherjou la3yalat. Bda lghna w chte7. Chwiya w 8iya tji 3a2ilt Jwilili. Jwilili 7ta houwa kayn. Labess jelaba twal menou. Khadouj elbargaga 7ta 8iya jat. Khass8a mat felet walou. Walakin wakha 8akdek, machi chrira. Jaybin karro m3ahoum, 3amer b d8azi. Mouy tsadmat, jabou m3ahoum droba. (M3a lwa9t, 3raft b li 3amou houwa li khra droba).
7na jina nbarkou lalla la3roussa … la gal8a la gal8a ygued bi8a … daha w daha wallah ima khla8a, datou wa datou wallah ima khalathou … ….
Dakhlo diaf. L3yalat f ji8a w rjal f ji8a. Jat 3andi el7ajja Fatna, selemt 3li8a. Daret liya teslima na9sa. Ma3art mal8a m3aya. Elmou8im, saba9na lghda ldiaf . S7ab la3robya kay bghew ytghadaw bekri. Khali dba7 droba, l la3cha. Fatna jabet m3a8a bezzaf dial ness. Drari yna9zou f lmra7, ga3 netfou lina lkarmoss li ba9e khdar. Diaf klaw djaj, w sefa, w dissir (dela3 w swi8la w la3neb w lbanane w tefa7 w lkarmoss). Charbou lma dyal lbir. Safena8 w derna fi8 gotra dyal javil. Drari li men 3adna, man3inoum yjebdou lma men lkhabia. 7it 3arfinhoum. Kay ykhchiw ydhoum kamla m3a elghoraf.
(Bini w binkoum, ness douari 3andhoum m3a had elfawaki8 bezzaf. Ama l7am, ntghedaw bi8 w nt3achaw bi8. Attay ... man 8adroch 3li8).
Jabo l3yalat atay ldiaf w sinia liya, fi8a el7enna (wragu), w swak, 9aleb dyal sokr, w lwimina gharsin fi8a ned. Jabet mouy chme3 w jebania mkhalt8a fi8a el7enna. Kelfo khalti Rab7a bach t7ani liya, ch7al 7nina 8ad khalti. Gatrek chme3 f ydi w 3ad tlat8a b l7enna (ma keyn la nakch la walou). 7enat liya rjliya. F nefs elwa9t, la3yalat kay ghaniw w ydarbou b t3arej.
A chem3a 3ali 3ali w diri gara, 8a Dawya ya lnowara … Se3di ya lalla far7i ya lalla, zouwejt wlidi w 7ayet loum 3liya … ... 7atou la3yalat labyad, ila moot Jwilili. Bkat chada roukna. Diaf klaw men ba3d lmsemen w el7alwa m3a attay w l9a8wa. B9a darb w chtay7. Serdet liya khalti Rab7a el7enna b attay, bach tzid tek7al. W ghatat ydiya b ligat khassin ll7na. 8datou liya meskina. Jaybahoum men lmdina. T3achina. W 3a2ilt Jwilili mchat m7ed mazal ma dlam el7al. Ma keynch daw f douar. Khali sed 3la hadek el7am lkhdar li chat f bit lkhzin. 3alegu li 9dar y3alegu f l9anba, w sed lbit b zakroum. Khela ta9a me7loula, bach yb9a elbit mnefess chwiya. 3adna moucha, 8ad chi 3lach ken 7dew m3a el7am. Rjal 3a2ilti na3sou f lkoba li 3la bara. W l3yalat, f lkoba li ldakhel.
Modifié 5 fois. Dernière modification le 25/07/20 21:56 par لبطانة.
(N8ar li kherjet mouy tkhtar d8azi m3a khalti Izza., tla9aw b Fatna w Khadouj. Kan tabe3houm Jwilili men b3id. Fatna galet lmouy b li ghadya tdir 7aflet l3arss f khaymet8a, mora dreb sda9. W 3almet8a b li ma ghadyach tdir li8 n8aro dyal l7enna. Khadouj : ana 3arfa Tamou b li ma tafe9toch 3la hadchi, walakin, ja 3am Jwilili men elkharij w bgha yfra7 b weld kho8).
(M3a elwa9t, 3raft b li 8amo ma 3ajbatoch lmo3amala dyal mart kho8 m3ana. Gale8a, ness Allah y3amer8a dar, w nti, tmimi3a, ma bgheti tkhessri 7ta franc 3la weldek elwa7id. Koun kan el mar7om khoya 3aych …. safi … ana ghady ntkelef b khlass l7afla … w 3andek t3ardi liya 3la nass douar kamlin … 3ardi ghir 3la li 9reb lina. Fatna kat khaf menou w mat9darch trod 3li8 el8adra. Binathoum wa7ed mochkil dyal ard ).
(7ta Jwilili miyet li8 ba8, Allah yra7mo. Ma 3ando la khot, la khwatet).
N8ar 3 :
Khrej khali bekri yjib l3doul b tonobil. Lmdina chwiya b3ida 3lina. Kena dayrin m3a Jwilili w 3a2ilto yjiw m3a lghda. L3yalat tkelfo b lghda. Lbnat wejdo liya l7amam. Kay zaghertou w yghaniw. 3awmetni khalti Rab7a. 7iydet el7ana, w b9at ket waseni 3la el7ayat zawjiya, 3la l7ajja Fatna. Galet liya : ila bghiti bniyeti la3sel (3icha sa3ida m3a Jwilili), khassek tsabri 3la 9rayss e-n7al (Fatna, 7na 3arfin fi8a 3achra). Kharjouni men l7amam w lebssouni 9oftan dyal jo8ara,w cherbil. Char3i ghataw b zwiyef. Louwew 3liya twiyeb byad khfif. Wj8i ma kench bayn.
(7ta wa7ed f l3a2ila ma 3aref b li ana li tlabt yd Jwilili. Khadouj ma day3etch 8ad lma3mola w wsat Fatna w Jwilili bach 8ad lma3louma tb9a mestoura. Wakha 8akdek ken bghe Khadouj, 7it b7al li ket ji men ji8ti).
Koulchi ja : Jwilili w nasso f tonobil (3amo li ja men elkharij, w 3amo akhor w mo, m3ahoum jarthoum Khadouj), w khali m3a l3doul. Dakhlo rjal f 9oba. W dakhlou Khadouj w mo l 9oba li fi8a la3yalat. Tghadaw ness. Nawdona ana w l3yalat li ghadin y7adro ldreb sda9. Brekna f ji8a lokhra dyal 9oba, mba3din chwiya 3la rjal w 9at3in el7ass. Jabet khalti Rab7a swani dyal atay. Elmou8im, l3doul bdaw y9omo b chgholhoum. F sda9, 7at Jwilili wa7ed rzeyna fi8a dbalej dyal d8ab. Chadetni elkhal3a. Wlit ken goul m3a rassi, yak ma tsara3t, yak ma guelbetni chamch n8ar li chefto men b3id w ma kentch mghatya rassi b taraza. La la, ghir lwesswess 8ada. Jdoudi ga3 tzawjou bla ma yt3arfo 3la lmra 9bel, w sda9 lihoum zwaj. Meli ja lwa9t bach nw93, ktebt l7arf « ba » w 7arf « del ». 8adou li na3raf.
(Tfakert n8ar jat 3adna bent khalti Izza, li b7al khti, w jabet m3a8a ktab. Kanou man3in 3lina walidina n9raw. Ghir loulad li kanou kay seftohom ljama3 li ja ji8t elkoudya. Bent khalti kan 3and8a kho8a li kay mchi w ba3d marat ken kay 3alam8a chi 7rof, walakin ken khass8a tdir chi chghal f blassto bach y9bel y3alem8a … Ana khoya ma9rach, b7ali. Mcha lkharij, walakin ma 3andouch lora9. Ma 9darch yji l3arssi. Allah li 3alem bi8 w b machakilou f lghorba. Nkhaliw 8adak jmel ragued).
Drab 3liya Jwilili l9aghet w mcha m3a 3a2ilto bach ykemlou twjed el7afla li 3andhoum b lil.
Modifié 3 fois. Dernière modification le 26/07/20 02:08 par لبطانة.
Je me suis régalée à revivre les mariages de la famille et certains moments de mon enfance dont tu parles f l3oubya
"Quand la nuit tombe, n'attends pas le matin et quand le jour se lève, n'attends pas le soir. Profite de ta santé avant ta maladie et de ta vie avant ta mort"
F khaymet Tamou : Lbnat wejdou m3aya balizti. Khadouj b9at m3ana, jat8a dokha w ma 9adretch tmchi f tonobil m3a Jwilili w 3a2ilto. Ma kayn li ydi8a f lkarwela lkhaymet8a. Chedet l9ont w b9at 7adyana. Chafet l3yalat kay wejdou f li ghadyn ydiw f lkarro gheda f sba7. W galet lihoum : blach lfrach, ra8 chra li8 3amo wa7ed jdid, b koulchi li8. Bla met tma7no. Darou l3ayalat b klam8a.
(F 8adek l wa9t, 9lil li kan 3ando tilifoun, kena nsemiw ferda dyal sebat. Ma kanch fin tcharji8 b lkhet. Khassek tamchi lwa7ed l7anout li ja 7da chanté. Elmou8im, naf3ouna l ma3moulat li 3tatna Khadouj lbergaga 3la 7aflat l3arss li mwejda Fatna. Galet lina b li Jwilili sawb zakroum l bit n3ass, w dar li8 9fel. Gad fi8 lfrach, galet liya chno mtaybin lla3cha.)
Kemlou w gadou 7althoum. Lebssou loulidat 7wijathom. (Bghaw yterou b lfar7a, jab lihoum khali had sba7 l7alwa Henry’s men lmdina w lkawkaw. 7ta ana jabhoum liya 7it 3areftni ken moot 3lihoum).
7aydou liya 9oftan dyal jo8ara. Lebssou liya wa7ed 9oftan byad khfif dyal jo8ara ta7t takchita bayda (b9at mouy m7afda 3li8a men 3arssha, w bghat tebe3 el3ada). Lbesst serwel, w cherbil dyal sam. Rekbet liya khalti Rab7a lkholkhal f rjal. Darou liya jouj dafrat. Galet liya khalti Rab7a : 8adou khass Jwilili houwa li y7elhoum lik. Darou liya chedda, w mensawch jo8r. Rekbou liya dbalej li jab liya Jwilili f sda9. 7azmouni b lmdama dyal mouy, li jab8a le8a bouya Allah yra7mou. Darou liya la3kar lfassi w lk7ul. Souwkou liya. Rachou 3liya chwiya dyal re7a, fi8a el mesk, jayba8a khalti Rab7a m3a8a men lmdina. Lebsou liya jelaba, w darou liya el9ob 3la rassi bach ma ybanch wj8i bezzaf. (Khalaw liya ba3da mnin ntnafess) Zouj bnat men 3a2ilti lebssou 7ta houma jelaba bayda w darou l9ob 3la rass.
Raj3ou rjal bach ydiwna lkhaymet Fatna. Rekbou m3aya f tonobilt khali lbnat li labsyn jelaba bayda, w mouy lgoudam. (rani msa8da, labssa bezzaf, w ma kayna ferfara f tonobil). Chi rkeb f lkarwela. Chi mcha 3la rejli8. Chi mcha rakeb f lkarro. L3yalat li flkarro kay dorbo b t3arej. Li rakbin flkarwela chadin f ro7houm, tregu chwiya m7afra.
Mazal ma dlam el7al. Wsalna m3a khali w mouy w lbnat 7na lakhrin. Nzalna men tonobil. Tlegaw lina l3yalat b tmar w l7lib w zgharit, ra7bou bina. Fatna mghowbcha. Khadouj galet lFatna, dihoum a khoyti lbit la3ross li ghadya tro7 fi8. Datna Fatna l bit. B9at 3li8a Khadouj 7ta khalet lina sarout dyal l9fol. 7atena l baliza w 7ayedna jlalebna. Darou liya twiyeb khass l3arss bach yghatew liya wj8i w dakhlouni l9oba li fi8a l3yalat. Senahoum m7ay7in b t3arej.
Rjal mchaw lkhzana li 3la bara. Sabou lfar9a mazala khedama. Kanou mwejdin l bota li ken rekbou le8a chebka w kat dawi.
Dlam l7al.
Cha3lou lina chma3 f l9oba. 7ato la3cha lnass. Khadouj jabet lkhbar s7e7a, ma 3andi men sal8a Jabou atay w l7lawi, baynin machriyin men lmdina. 3am Jwilili li ja men elkharij ma khalla lness ma ygoulou flmakla.
B9a chtay7 w lghna 7tal nsasat lil.
Modifié 2 fois. Dernière modification le 26/07/20 21:53 par لبطانة.
F wa7ed lwa9t, nawdoni l3yalat lbit li ghadya nro7 fi8. Dkhal Jwilili, sed elbit bzakroum. Awal mara ghady ychoufni men 9reb w 7ta ana, w ghady ytkelem m3aya. 7ayed twiyeb li mghate liya wj8i. Kent 7adra rassi, cheft douk rjlin w tekhla3at. (Jwilili ken twil w ghled chwiya. Ana 9serra w d3ewfa). Man 9darch n3awd likoum chno w9a3 men be3d b tafasil. Douwezt sa3a f lja7im … L3yalat kay ghaniw 7da lbit. Da9an flbab ma zguach … Fatna : serbiwna, ness ketsena … Jwilili, ila ma kan walou, tala98a men daba. (Fatna ma 3arfech b li lmochkil y9dar yji men rajel …) Da9an 3awd tani …. Jwilili khrej w mata serwel lmou. La3yalat darou8 f sinya m3a l9aleb dyal sokr, 7ateno foug wragu l7enna w lward … b9aw yghaniw w ychat7ou.
A Dawya, a lmardya, 8akda ykounou bnat rjal lma7deya …
Ness barkou lJwilili li khrej men elbit. Jwilili fer7an … khalani sakhfana flbit. 7atou tani attay m3a l7elwa lness. Wa7ed chwiya, bda ytla3 sba7, w houma ymchiw ness li men 3a2ilt Fatna w li men 3a2ilti. B9ayna ghir ana w Jwilili w mou. Dkhal Jwilili lbit bach yrgoud, sed lbit bzakrom li ldakhel.
Khaymet Fatna ma b3idach bezzaf 3la khaymet Tamou. Ness 3a2ilti mchaw lkheymet mouy. Rjal na3sso fl9oba li 3la bara. Drari w lbnat ferchou lihoum f 2 byout. La3yalat na3ssou chwiya w nado bach ywejdo lftor dyal la3rossa. Taybo lmsemen, l7archa, lkhobz, lbaghrer, chiyar … (Fach ken khali f lmdina elbara7, chra m3a8 l7lawi li ghadyn yjibou f lftor. W fach kan raje3, daz deghia 3la khaymet Fatna w 7at le8a t9adiya dyal lkessksou, bach ytaybou8 l3yalat f lghda, n8ar sbo7i)
Ama ana, man3astch, kount ghir mtekya. Jwilili kay chkhor. B7al li mtekya 7da tractour. Dazet takreben chi noss sa3a w jat Fatna lbit. Galet liya : l7afla salet, ghadya t3ari 3la dra3ek. Siri deghia ghessli 7altek fl7amam w aji 3awnini nwejdo leghda. Men ba3d, ghadya tnadfi deghia lbyout, w l9oba w lmra7, wtwejdi swani m3a lkissan. Ghadya nkhali Jwilili yn3ass chiwya, 9bel ma ynod ykharej lb8aim, ywouredhoum w y3mar lbota dyal ma2. Dert li galet liya. Wa7ed elwa9t jat Khadouj. 3awnetna meskina. Chafet fiya w b7al li 7asset biya. Fa9 Jwilili. Sawbnali8 lftor, w khrej y9de choghlo.
Khadouj galet lFatna : ness ma b9a lihoum walou yjiw. Khali8a tbedel 7alt8a, w tgued bit8a houwa li mazal matjma3. Ana ghadya nkemel li b9a f blasset8a. Khadouj : yallah Dawya, ghadya nel7agu 3lik lbit men 8na l chwiya.
Dkhelt lbit. Jma3t 7wayj Jwilili w jma3t denia. Gadit blayssa fin yberkou la3yalat li ghadin yjiw lbiti. Ghadyn ykounou nass 9lal. 2 7atat 3and rjal w 2 3and la3yalat. 3ardat Fatna 3la chi ness, w ghadin y kounou nass men 3a2ilti.
Koulchi ken wajed 3and 3a2ilti. Kanou 2 kwaro. Wa7ed fi8 lftor 3la 7a9o w tre9o. W lakhor, 3amer b li ghadya n2atet bi8 « dari » li 8ya khaymet Fatna. Fi8 : lezor matrozin m3a lghchawat dyal lousayd, 9lo3a matrozin w sribtat, tass dyal laghssil, m9arej, mwi3nat, fotat, binouarat, la3bana, manta, zarbya ...
Jabet Khadouj hadik siniya, 7atet fi8a lbyad. Souwletni Khadouj : bniyti, wach sabe7 3lek Jwilili b chi 7ajja (d8ab), bach ila kan, t7otheha f siniya. Dawya : walou a Khalti Khadouj. Walakin, machi mochkil. Li mou8im, ykoun Jwilili ma39ol m3aya, 8adchi li talba. Lbesst 9oftan byad matroz. Ka7elt 3winati. Daret liya Khadouj dafra. Wsatni 3la Fatna. Galet liya : Fatna wa3ra chwiya walakin sa3fi m3a8a bniyti. Ma jam3atch liya Khadouj l gossa b lfililat lke7lin, w rakbet liya wa7ed khet ro7, ken dyal mouy.
Jat 3a2ilti w jaw ness li men ji8t Fatna. Chte7, w lghna w zgharit ma zgawch.
Modifié 5 fois. Dernière modification le 26/07/20 22:59 par لبطانة.
Dakhlo mouy w khalati 3andi. Salmou 3liya w barkou liya. 7ato lbyad f siniya. B9at mouy m3aya w nadou khalati l9oba li jam3in fi8a l3yalat. 7asset bl7ozn li 7wlet man biyench. Tamou : ness bekri galo « zwaj lila tdbirho 3am » … nti zrebti … w khtabti8 … 9aberti li8 chan. Daba bniyti ma 3lik ghir b sbar, m3a Jwilili w m3a mo. Zwaj machi sa8el. Dawya : mouy, 3andi lik tleba. D3i m3aya b lkheir f ay wa9t, ysda9 liya 8ad zwaj w n3ich 8anya m3a Jwilili. Galet li "wakha bniyti" w mchat l9oba. Dakhlo 3andi chi 3yalat men 3a2ilt Fatna w kharjo. Jat bent khalti Izza, li b7al khti. Selmet 3liya w jabet m3a Khadouj hadak chi li ja flkarro. Setfou8 f 9ont dyal bit. Berket m3aya bent khalti Izza w galet liya : Dawya, 3awdi liya ki dazet l2omor. Dawya : khti, bghetini nkhal3ak ? … 7ta tzawji in chaa Allah w tjarbi. B9ena ken 8adro chwiya. Da7kteni 7it berket t3ayeb Fatna. Galt li8a : zgay l3firita, daba tji w twerini njoum f sma2. W men ba3d mchina l9oba. 7ato lftor.
Ken lghna w chte7. T7atet elmakla.
Kanet chwiya dyal 7arara. Tsanaw ness 7ta bred chwiya el7al. Charbo atay, w khdaw el7alwa w lfakia, 3ad mchaw. 3yalat 3a2ilti tsefto m3aya. 3anegut mouy b wa7ed ta3nigua. (
B9at m3ana Khadouj. 3awnetni bach njma3 denia. Fatna mchat terta7 f bit8a. Ta7et ki douda. Mamnou3 ndkhol li8. Ja mafrouz 3la lbyout lokhrin. (3taha Jwilili sarout tani dyal 9fol bitna, w saroutou dyal mario. 3andi gher sarout tani dyal mario). Jwilili ken kharej bara. Gualess ta7t chajra, ferech 7sera w galess y2akoul f lkarmoss, m3a lkhobz. 7ade b8aymatho men b3id.
Wa7ed el wa9t, ja ould Khadouj men lmdina b tonobil, ch7al ma chaf8a. Yallah ched semana dyal 3otla. 3aych bo7do. Gal le8a jit ndik tfouwji chwiya f lmdina w twensini f 8ad l3otla.
Khadouj 3arfa b li Fatna ma ghadyach tkhalina 3la ra7etna had simana. Bezzez bach 9an3et8a tmchi m3a8a. Taf9o bach yraj3o 9bel n8ar "le7zam".
Modifié 2 fois. Dernière modification le 28/07/20 00:00 par لبطانة.
Bdina net3arfo 3la ba3diyatna. Tfakerna n8ar li ta7t men foug l7mar. D7akna. Meli kay bred el7al, ken nfarcho f lmra7, w n2aklou lkhobz wla lmsemen w ncharbo atay. (Jwilili b7ali, ma 3andouch bezzaf m3a el9a8wa). Fach kay mchi Jwilili lso9, kay jib t9adya li kan wase8 3li8a w ma ynsach Henry’s w lkawkaw (liya) w lkarmoss (madrob 3li8). . Gad m3aya bitna. Ferech m3aya zarbya. Fach bghit nsaben wa7ed la3bana, 7ta houwa chtef 3li8a, chiwya ma ta7 3la gounetho msikine. Fach kay dakhel lb8aim lkoury, ken rbathoum m3a8. Kan 3awno mli kay dakhel lbota dyal lma f lkhayma. Ken 3amro bjoujna lboudizat l9bar, w lkhabya. Kay 3ajbo njib li8 lmo9raj 3amer b lma2 w sabonya, w nghssel li8 8adouk rejlin. Ma b9awch kay khel3ouni. Kan batou lil gher f lmra7. Ken na3wd li8 khobera koul lila. (Liyoum ghadya n3aw li8 9esset bent derraz).
N8ar l7zam :
Khadouj w Fatna jaw f sba7. (Kanou ghadyn yjiw elbara7, walakin tonobilt weld Khadouj kanet khessret li8 w b9a 7ta sawb8a). Sabet Fatna lftour yallah t7at w sayra nkemel twjed lghda. (Fa9na bekri m3a Jwilili, w dba7 liya lfrarej li ghadya ndir 3lihoum lrfissa). Nadt selemt 3li8a. Deret li, kima al9a3ida, taslima na9sa. Fatna fatret w mchat lbit8a. Ma 3awdetch liya ki dazet semana dyal8a f lmdina, ma wratnich chno chret men tema. Ma bghatch t7achi8 liya. Daretni b7ali ma kaynach. Walakin kanet ta8dar m3a Jwilili f bit8a. Dit8a f choghli 9bal ma yjiw diaf. 8adak n8ar, ma kanou ghir la3yalat; 2 7atat.
Mli 9arbo yjiw ness m3a lghda, gadit 7alti. Lbesst 9oftan w cherbil w dert zif 3la rassi. Da9ayt f lbab dyal bit 3douzti. Dawya : khalti, yak ma kayn bass 3andek ? Fatna : khalini 3lek f te9ar. Daba nkhroj meli ghadyn ywaslo la3yalat. Di8a f choghlek.
Khrej Jwilili l3andi w sad elbab. Ba3d Jwilili w gal liya b li tla9aw 3la ghefla louss8a f lmdina. 3amo bgha8a tfade m3a8 lmochkil dyal l2ard 9bel ma yrja3 lbara. 3adchi 3lach tale3 le8a dem. Tlab meni Jwilili ndir li8a khater8a.
Jaw la3yalat, kanou aktaria men 3a2ilt Fatna. Khadouj la7guet 3lihoum. Men ji8ti, jet mouy m3a khalti Izza w weld8a (jabhoum f lkarwela). Kherjet Fatna men bit8a, mghowbcha. 7atena m3a Khadouj lghda f l9oba. Seguina tabssil l Jwilili w weld khalti Izza. Brekt m3a la3yalat. Lghna w chtay7 khedamin. Nawdoni. Khadouj mchat jabet m3a Fatna wa7ed l7zam men bit8a. 3ayto 3la weld khalti li ba9e 3azri. Rakeb liya weld khalti l7zam. Jabou zif kbir, jdid, w 7zemna8 3la da8ri b7al li m7amla deri. Koul mra khchat f ldakhel l7lawa, bach tkoun 3ichtna 7louwa.
Dazet liyam w dwzet 3liya Fatna dekaka. Bghit ghir Jwilili ydwi m3a8a, walakin 3awelt 3la ri7. F lkheyma, 8ya moulat ray w chwar. 8ya li takhtar chno ghady yt9ada Jwilili. Jwilili ma b9ach y jib liya Henry’s w lkawkaw.
Kay chri le8a bwikiyat dyal chabouane Cadum. Ket goul liya : ghessli char3ek b tid. Kan char3i rtab ki l7rer w wela 7rach, b sbab tid. Wa7ed n8ar, galet lJwilili : ghady tgata3 le3a 8adek salef, ma 3and8a mat dir bi8. Jab zezouar w bda y7ssek, khala char3i wasel lktafi w ma mghadch ... (Wakha 8akdak, 7medt rabbi ; 7it ma 7esskouch koulou, kora radni 9ar3a b7alou).
Ch9a koulou tkeb 3liya. Ket b9a 8ya f bit8a. Ket leu7 liya el8adra fach kay dor 7daya. (Galou zman : ljar7 ybra w yseyr malmoum, w klam l3ayb yb9a f l9alb marsoum).
Chra Jwilili motor dyal daw w telfaza sghera. Dakhlet8a lbit8a y katfarej f lmosalsalat fach kay koun lmotor khedam. Chkoun l9ayt b7ala. Mara mara ket ji Khadouj tfarej m3a8a.
Ma khalatnich nchouf 3a2ilti men be3d ch8ar dyal zwaj. (F l3ada dyalna, la3ross katmchi tzor 3a2ilt8a men bad ch8ar dyal zwaj).
Bdit ken twa7em. Fissa3 3arfet Fatna chno kayn. Jwilili ma jab ldenia khbar. Galet liya : deghya, deghya. Choufi 8ay, 7ta hajja ma ghadyat tbedel. Ch9a ghady yb9a houwa houwa, le7mel machi mard. W nzidek , n8ar li ghadya t7ote li fi kerchek, mat 3awlich 3liya n3awnek 3lik. Jwilili sket, ma dwach. Fach kan kounou bjouj f lbit, kay goulya : sabre, ra8a mouy 8adik. Ma 3andi kin dir li8a. Dima tebe3t 8adert8a w ma ghadych ntbedel. Salina l8adra. Guelt f khatri : a mgwani… dert8a bydi w kanet mouy kat goul8a, Jwilili ra8 weld mou. Ila galet li8 Fatna tale98a, ghady ytale9ni b7al da7k, wakha ykounou 3adna tringa dyal drari. (Galou ness zman : li dar8a bidi8, yfek8a b seni8). Rdayt b l8am, ma rda biya, dertou 3and rassi, sba7 3and rjliya.
Ma ket khalich ychri liya tmar. Jani lou7am 3li8.
Wa7ed n8ar, daz khali ychoufni. Jwilili ken f so9. L9a Fatna barka 7da lbab dyal khayma, li 3la bara. Souwel8a 3liya, galet li8 : ra8a na3ssa, douz n8ar akhor. Walakin 9cha3ni kharja men l9oba li 3la bara w li ket kan nadaf fi8a. Gale8a : yak a Fatna, ket kedbi 3liya, machi 7chouma 3lik. Khali : Dawya, aji a bniyti, bghet ndwi m3ak. Ba3edna 3la Fatna.
Swelni 3lach ma danich Jwilili 3and Tamo. Kheft njawbo b l7a9e9a w nsda9 f lmachakil. Guelt li8 b li ma l9ach l wa9t w daba ndouzou chi n8ayer. Khali : Dawya, benti liya chwiya 3iyana, yak ma kayn bess ? Khbarto b likayn, barek liya, w gal liya te9led f 3onguek, ila tcha8iti chi hajja, gouli8a, mat 7achmich. Khali : ghady ndouz 3and Tamou, douzi b kheir w di8a f rassek.
Modifié 1 fois. Dernière modification le 28/07/20 01:24 par لبطانة.
( 
chargement...
+ 
